Milan "Ikën Ronaldo, vjen Drogba?!"

Flamengo është shumë pranë Ronaldos, Milani është shumë pranë Drogbasë. Do të dukej si një lojë fjalësh nëse merkato nuk do ta lejonte që kjo të ndodhte, por kur bëhet fjalë për “lëvizjet” në tregun e shit﷓blerjeve, gjithçka është e mundur, sidomos kur “politika” i përket një klubi me famë botërore dhe që ka fituar shumë në këto 20 vitet e fundit, duke arritur një nivel prestigji tepër të lartë. “Fenomeni” nuk është më si dikur dhe, për më tepër, pasi ka marrë besimin e drejtuesve kuqezi, vazhdon të qëndrojë jashtë fushës, për dëmtimet e shumta dhe për ndonjë “tekë” psikologjike, që e ka bllokuar. Për këtë arsye, nëse në janar braziliani nuk rikthehet në fushë, atëherë gjithçka mund të marrë fund dhe oferta e ardhur dje nga Brazili, nga skuadra e Flamengos, mund të merret në konsideratë nga kuqezinjtë. Ndërkohë, “Djalli” vazhdon të masë terrenin për sa i përket blerjes së një sulmuesi që do të nxirrte nga kriza repartin e avancuar të kampionëve të Europës. Ançeloti nuk është aspak i kënaqur nga Xhilardino dhe Ronin nuk e ka pasur asnjëherë në dispozicion, me përjashtim të ndeshjes ndaj Kaljarit. Emrat më të “lakuar” janë Amauri, Tomazo Roki dhe... ëndrra e Galianit, Didier Drogba. Nëse Berluskoni shpreson te Ronaldinjo, administratori i deleguar i klubit, sipas “News of the world”, ka nisur tratativa të fshehta për të siguruar sulmuesit nga Bregu i Fildishtë. Flitet për 23 milion stërlina, por gjithçka mund të arrihet vetëm në qershor. Deklarata e Drogbasë për të luajtur te Milani ka ngrohur të gjithë tifozët kuqezi. Ndërsa dje, presidenti i Flamengos ka thënë: “Flamengo ka marrë autorizimin e Milanit për të trajtuar me lojtarin. Kemi biseduar shpesh me lojtarin dhe ai ka mundësi që këtu në Brazil të rigjejë qetësinë dhe të rikuperohet plotësisht”. Me Flamengon, Roni mund të firmosë deri në 2010﷓ me opsion rinovimi.