Shifrat “thonë” Arsenal, për Vengerin ende herët!

Nëse gara e Premier League është si një maratonë, atëherë është pikërisht në çastin e ndërrimit të viteve që pjesëmarrësit fillojnë të shohin për objektivat. Kur Arsenali mundi Totenhamin të shtunën, për të siguruar vendin e parë në renditje edhe për Krishtlindje, ishte e domosdoshme shikimi i statistikave. Dhe me sa duket, fitueset e katër sezoneve të fundit kanë qenë në krye edhe në këtë periudhë. “Eshtë e rëndësishme që të jesh në krye dhe shpresoj që statistikat të vërtetohen edhe këtë herë”, tha Arsen Vengeri kur e mësoi këtë. “Nëse ndodh vërtet, le të shkojmë në fund të sezonit që tani! Por, pa shaka, mendoj se është shumë herët për të thënë ndonjë gjë konkrete. Në dy sezonet e fundit, në këtë periudhë të vitit, ka qenë një skuadër e shkëputur në krye, Çelsi ose Mançester Junaitedi. Këtë vit ka më shumë kështu që është e pamundur që të thuash se si do të përfundojnë gjërat. Fakti që jemi në krye tani nuk na bën ta kemi të sigurtë kampionatin. Sidoqoftë, ky është një nga vitet e rrallë kur e kemi mundur Totenhamin në fushën tonë dhe në fushën e vet. Eshtë një shenjë e mirë dhe kjo duhet të rrisë besimin te skuadra. Kjo tregon se mund të marrim tri pikë pa qenë në formën tonë më të mirë”.

Mëse e vërtetë. Sepse pavarësisht futbollit të bukur dhe të rrjedhshëm, ka qenë aftësia e “Topçinjve” të rinj për të marrë fitore të sforcuara që ka mbajtur Arsenalin në garë, ndryshe nga sezonet e kaluar. Dhe ka më tepër shifra për të mbushur me optimizëm londinezët. Sezoni i Arsenalit arrin pikërisht në mes me ndeshjen e sotme ndaj Portsmuthit. Fitorja në ndeshjen e 19﷓të do t’u jepte plot 46 pikë. Dhe nëse do përsëriste të njëjtën gjë edhe në fazën e dytë të sezonit, atëherë në fund do të arrinte një kuotë pikësh të kaluar vetëm një herë në historinë e këtij kompeticioni. Por Vengeri nuk e mendon shumë gjatë. Ai ka kaluar 12 vjet me përballje festive si kjo dhe e di mirë që është një periudhë shumë e rëndësishme, jo vetëm për dhuratat. Deri në fund të muajit, Arsenali do të ketë luajtur po aq ndeshje kampionati sa do të luajë bashkë në janar dhe hskurt. Dhe tekniku dëshiron t’i japë fund vitit në mënyrën e duhur sot në “Fratton Park” e më pas në “Goodison Park”. “E dimë që kjo periudhë është e rëndëpër ne”, tha ai. “Kemi luajtur ndaj Çelsit dhe Totenhamit në fushën tonë dhe tani duhet të luajmë në fushën e Portsmuthit dhe Evertonit. Në fund të këtyre ditëve do të dimë më tepër se kush i ka mundësitë më të mëdha për të fituar titullin”.