Barça, më mirë pa Dinjon!

Përshtypjet janë se Barcelona luan më keq kur Ronaldinjo aktivizohet si titullar dhe këtë mund ta konfirmojnë edhe shifrat. Katalanasit humbën përballë Realit të Madridit me brazilianin në fushën e lojës, ndërsa në Valencia fituan në mënyrë komode me Ronaldinjon në stol. Rivalët nuk janë të njëjtë, por as nuk përjetojnë të njëjtën situatë. Por, çfarë ka ndodhur në ndeshjet e tjera ku ka qenë i pranishëm Ronaldinjo? Statistikat tregojnë se Barcelona fiton më pak pikë kur Ronaldinjo luan. Nga 17 ndeshje të luajtura në kampionat, ylli brazilian është aktivizuar në 11 prej tyre. Nga 33 pikë në lojë, Barça ka marrë vetëm 19 pikë (5 fitore, 4 barazime dhe 2 humbje), të cilat shkojnë te 57,5% të pikëve të grumbulluara nga skuadra katalanase. Barça ka luajtur gjashtë ndeshje pa Ronaldinjon, në të cilat ka fituar pesë dhe ka humbur një. Që do të thotë, ka fituar 15 nga 18 pikë të mundshme, rreth 83,3%, një shifër pothuajse perfekte. Rastësi apo jo, skuadra e Frenk Rajkardit ka arritur të marrë rezultate më të mira, kur tekniku holandez ka ulur në stol yllin brazilian. Duket se varësia nga Ronaldinjo ka marrë fund dhe skuadra e Barcelonës është mësuar të fitojë edhe pa të. Prezenca e tij në fushën e lojës nuk ka qenë pozitive dhe Ronaldinjo për asnjë moment nuk është ngjitur në lartësinë e duhur. Problemet dhe pakënaqësitë ndaj tij kanë qenë të shumta, por përsëri skuadra e Rajkardit nuk e ka patur të vështirë të “jetojë” edhe pa Ronaldinjon. Braziliani mbetet një lojtar i madh dhe me aftësitë shumë të mira, por rrethanat janë të tilla që i lejojnë Frenk Rajkardit që të bëjë edhe pa të. Me një Mesi në formë të shkëlqyer, me një Eto’o që ka rigjetur golin dhe me dy të rinj si Bojan dhe Dos Santos, tekniku holandez i ka të gjitha mundësitë që të ndërtojë një Barcelona të madhe pa Ronaldinjon.