Uejn Runi “Më datë 1, jemi ne të parët!”

Sulmuesi beson: “Nuk është shumë e largët dita që ne mund të kalojmë para tyre në renditje”

Sulmuesi kryesor i Mançester Junaitedit, Uejn Runi, beson se ka ardhur çasti i duhur që “Djajtë e Kuq” të kalojnë Arsenalin në krye të renditjes së kampionatit anglez. 22﷓vjeçari e di mirë që gara për titullin këtë sezon do të jetë shumë e fortë dhe se ndeshjet e fundvitit ndajnë jo pak, prandaj ai shpreson që festat t’i bëjnë më tepër dhurata skuadrës së tij se sa kundërshtarit. Ai tha për mediat angleze: “Eshtë tamam çasti i duhur. Pasi pashë Arsenalin dhe skuadrën tonë që fituam pa qenë në ditën tonë më të mirë, mendoj se nuk është shumë e largët dita që ne mund të kalojmë para tyre në renditje. Kemi disa ndeshje tani në një periudhë të shkurtër kohe dhe shpresojmë vërtetë që të përfitojmë sa më shumë nga kjo”. Të dielën, Junaitedi mundi 2﷓1 Evertonin, falë një penalltite të realizuar në fund nga Kristiano Ronaldo, ndërsa Arsenali mundi me të njëjtin rezultat Totenhamin. Në ndeshjet e sotme, një ditë pas Krishtlindjeve, “Djajtë e Kuq” do të ndeshen me Sanderlendin e ish﷓it Roi Kin, ndërsa “Topçinjtë” i pret një sfidë e vështirë në Portsmuth, një fushë ku Junaitedi ka humbur. Në fundjavë, Junaitedi do të përballet me Uest Hamin, ndërsa Arsenali do të luajë në fushën e Evertonit. Në letër ndeshjet duken më të fortë për londinezët dhe Runi shtoi: “Duhet të luajmë me presion ndaj kundërshtarit, sepse kështu fituam ndaj Evertonit dhe kështu mund të fitojmë edhe ndaj skuadrave të tjera që do të kemi përballë. Na ndan vetëm një pikë me Arsenalin, kështu që gjithçka mund të ndodhë në këtë javë”.